社区

呢几日见外围系咁落，应该都系美国减息预期落空单嘢有关， $HSI(HSI)$ 又唔经唔觉开始讲返去16000点有无支持，今日返嚟见牛熊街货，牛证啲货仲多过楼下街市啲真牛，15800至15899点博老命坐住过2000张期指街货，仲有三层过1千张都已经唔系点理佢住。

但睇过日线同小时图嘅就会见到，技术走势上其实指数都有似出触底回升嘅情况；按照过去街货 VS 技术分走势嚟讲，前者赢嘅机会率都唔细。

嚟到依家9点48分，仲未见恒指扑埋去堆肥牛度，见佢上上落落咗都唔知几多次，同步喺五分钟见指保历加通道口收窄，唯独是一条大约喺1625X点嘅量度线尚算画得到。

真系喺作战室Plan定淡仓追杀重牛，中途有啲心急出咗淡仓但最后都系失败；唔紧要，衰心急呢啲心理质素嘢唯有喺作战室里面呙战友用吹水嘅方式挨过要等但手痕嘅时间。差不多10点，五分钟图见保历加通道口拓阔，过晒之前mark好嘅线位，反地心吸力出好仓。

小时图10点打后亦确认得到Slow STC(14.3)两线触底回升，仲过埋10线，借小时图做佛系的话，恒指牛(50110)，收回价15850点，同现价有约370点距离，杠杆有约38.63倍，够做day Trade架啦。

依家10点7分，借小时图硬入可以，但留意注码，因为随时要alert五分钟图上整条保历加通道会变变转向上移嘅情况，咁Swing Trade就会出现，不利好仓架啦。

最后，Mark住喺watch list嘅SPDR金ETF(02840)，今朝开市见佢向下再靠近日线图10线多少少，Keep住等睇佢回返落去10线见支持先至出手啦，原因呢几日都有讲过架啦，不赘。

唯另一边厢都同时留意住中东地缘政局嘅发展，事关这边厢市场对美国减息预期降温，少少拉返金价向下，目前算是得返班中东王子顶住个金价架咋。

作者阿珊，以技术分析专心玩轮证，唔贪心，努力赚取我家肥猫罐罐。