陈师奶个仔同TQQQ有什么关系？

陈师奶个仔同TQQQ有什么关系？

前几日同老陈茶聚，佢一坐低就面色凝重，眉头深锁，神情严肃到好似要同我讲国家机密咁。

「喂，你知唔知而家美伊开战呀？啲导弹飞来飞去，搞到个市震腾腾，点解你仲可以好似冇事发生咁，仲够胆伺机入市TQQQ？」

我听完，笑而不语，轻轻呷咗啖普洱，然后反问佢一条完全唔关事嘅问题：

「老陈，我问你呀，我屋企隔篱嗰个陈师奶，最近生咗个大肥仔，成八磅重，眼仔碌碌好得意，你知唔知呀？」

老陈即时呆咗，满头问号，眼神空洞得嚟带点疑惑：「吓？边个陈师奶呀？佢生仔关我咩事？」

「Exactly.」我话，「呢个就系我嘅答案。」

---

### 战争系不幸，但唔代表你嘅股票要陪葬

战争，冇人想。但坦白讲，呢啲系国家大事，小市民担心都冇用，唔通你同普大帝倾吓计？唔好讲笑啦。

战争无疑会冲击社会，甚至震散市场情绪，但唔代表每个行业都要陪葬。尤其系以科技股为核心嘅TQQQ，佢嘅成份股唔系军火商，唔系油轮公司，而系NVIDIA、Apple、Microsoft呢类全球巨头。佢哋嘅生意唔会因为中东有烟花而即刻停摆。讲句难听但现实嘅：战争摧毁咗某啲设施，战后重建反而可能带动需求，科技公司随时系「另类受惠者」。

至于TQQQ里面嘅非科技股，例如Costco、Pepsi呢类行业龙头，战事或者会短暂影响消费意欲，但呢啲大财团，生意稳过你屋企只饭煲。你唔通觉得，中东打杖，香港人就唔再买可乐、唔再入货仓扫厕纸？唔好玩啦。反而，战争带嚟嘅混乱，可能成为佢哋低价并购对手嘅机会——即系「趁火打劫，但系合法嗰种」。

---

### 市场情绪：悲观者抛出烫手山芋，乐观者当系和牛

我哋买股票成日见到一个现象：一有坏消息，全场鸡飞狗走，明明你只股票冇做错任何嘢，业绩靓仔到冇朋友，都照样被拖累下跌。

呢个时候，你就要谂起我同老陈嘅对话：

陈师奶生仔，关老陈咩事？

中东打仗，关TQQQ咩事？

如果只股票嘅基本面冇变，纯粹系因为「大围气氛」而跌，咁你就唔使惊，反而应该问自己：我够唔够胆趁低买多啲？

正如英国作家狄更斯喺《双城记》开头所讲：

**「这是最好的时代，这是最坏的时代。」**

同一单新闻，悲观者见到末日，乐观者见到机会。

悲观者抛出嘅烫手山芋，正正系乐观主义者梦寐以求嘅笋货。

所以，当老陈问我点解仲敢入市TQQQ，我嘅答案好简单：

> 「因为我买嘅唔系新闻，我买嘅系企业。导弹唔会射落我只股票度，但恐慌会。而恐慌，就系我嘅入市讯号。」

---

总结

1. **战争系大事，但唔系你只股票嘅直接敌人。**

2. **市场情绪经常过度反应，悲观时反而要冷静。**

3. **只要基本面冇变，恐慌性下跌就系机会，唔系警钟。**

4. **陈师奶生仔，真系关老陈冇事。**

下次你见到有人因为新闻而慌到想清仓，你可以请佢饮啖茶，然后温柔地问佢一句：

「喂，你知唔知陈师奶最近生咗个大肥仔呀？」